روح الطيب
انه بروحي زرعت الطيب للناس وحصتي من الزرع حصت الفلاليح
ولكن بين هذا الحال والحال قضيه تريد واحد يوكف يصيح
عله جروح الزمن حطوني تمثال قوافل تمسح اسمي ابلايه تصريح
مااكدر بعد وتحمل الحال التواضع ذله صار ولابد يطيح
عراق انه وعراقي التعرفه الناس ما يهتز سعف من تعصف الريح
ولانهري نشف للكال عطشان وبي عاشت عمر كل الملاليح
بمراجيح التعب كاسرت السنين وبنيت اسنين حلوة اعله المراجيح
شكثر مرت سوالف وانه عطشان وكولن خير عندي وانثر الخير
شكثر ربيت انه وعلمت الناس وعله مايي شكثر عاشت نواعير
بديه بشوك تغفه هوايه شبان واذا يوسف اجه ما صدك يحير
لان ماعندي مثل اولاد يعقوب ولا تلحك تمر سالفته علبير
هذا انه العراق الكلي خيرات وتشهدلي الدلال البل دواووين
مو بس كهوة اصبن من يمر ضيف اصب غيره وكرم وي الفناجين
ولان عنوان حيدر يعني معروف وعمة الما يميز بالعناوين
ورثت الانبياء وكلهم اهنا وعلة كاعي ابشرف دكو نياشين
وكاعي اشما تمرهه بخيره تجود لان بيهه شلت شدة رياحين
شلت جربه الملاهه بدمه عباس وشلت نهر الفرات بدمعة حسين
وشلت شبان تكره طخت الراس وعدهه الروس تذبح بالسجاجين