]بغداد : الو
الأبن : ألو هلو يمة شلونج اني ابنج زياد تتذكريني ؟؟
بغداد : و هو أكو أم تنسه ابنهه ؟! شلونك يمة شلون صحتك ؟
الأبن : اني موزين يمة , والغربة ذبحتني والناس مترحم بحجيهه , يعايرونة لأن عفناج و انتي بأعز حاجة النه
بغداد : لا يمة . كولهم امنه طلبت من عدنه نعوفهه هسه لأن مريضة و خايفة علينا من اللي صاير بيهه , اني اللي ما اريدكم تشوفوني بهاي الحالة اللي اني بيهه ويجي يوم تتحسن حالتي و ترجعولي كلكم و نرجع مثل قبل واحدنه ميفارك اللاخ
الأبن : زين يمة مرضتج رح تطول لأن حاس نفسي رح اموت قبل ما أشوفج
بغداد : لا يمة اسم الله . أن شاء الله ترجعولي بأقرب وقت انتو بس اندعولي الله يزيل عني هاي الغمة
الأبن : ان شاء الله يارب تردين لعافيتج مثل ما عرفناج قوية و متهزج ريح
بغداد : اي يمة احجيلي شلون عايش حياتك ؟
الأبن : والله يمة حال الضيم حالي , لا أكلي أكل لا شربي شرب لا نومي نوم وأذا غفت عيني لحظة احلم باليوم اللي ارجعلج بيه
بغداد : وأخوتك و خواتك شلونهم ؟
الأبن : حالهم من حالي
بغداد : يمة هم يجي يوم وتنسوني و تاخذكم مشاغل الدنيا عني ؟
الأبن : لا يمة شنو هالحجي , ننسى نفسنه و مننساج , رضا الرب من رضاج , نبيع الغالي وبيه نفداج
بغداد : صدك يمة ماشفت ابناء يحبون امهم بكدكم , والتاريخ مرح ينسه ناس حبوا امهم لهالدرجة
الأبن : كل اللي نسويه ونكوله بحقج و هم نحس نفسنه مقصرين ..... ألو ألو ألو يمة يمة
أنكطع الخط ... لتنسون , حاولوا كل يوم تخصصون دقيقتين من وقتكم و تخابرون ماما بغداد و تسألون عليهه , هيه محتاجة تسمع صوتكم
الجمعة مايو 02, 2008 3:22 pm
